Turmush — Ысык-Көл облусунун Каракол шаарында кечээ, 12-апрелде 3 унаанын катышуусунда жол кырсыгы катталды.
Күбөлөрдүн айтымында, кырсык Ахунбаева менен Жамансариев көчөлөрүнүн кесилишинде болгон.
Буга чейин жергиликтүү тургундар аталган кесилиште буга чейин да кырсыктар болуп жатканын айтып, жол чырак коюу керектигин айтышкан.
Ал эми Ысык-Көл облустук жол кыймылынын коопсуздугун камсыздоо бөлүмүнүн маалыматына караганда, кырсык болжол менен саат 16:50 чамаларында болгон. «Volkswagen Passat», «Mercedes-Benz Sprinter» жана «Toyota Camry» унаалары кырсыкка кабылган.
Учурда унаалар айып короого токтотулуп, териштирүү иштери жүрүүдө.
Акыркы айларда эле аталган кесилиште бир нече жолу кырсык катталды.
Turmush 2026-жылдын 25-мартында Каракол шаарынын Ахунбаев жана Жамансариев көчөлөрүнүн кесилишинде эки унаа кагышканын жазган.
Ысык-Көл ОИИБ тастыктаган маалыматка караганда, Каракол шаарынын тургуну Ч.Ж. «Daewoo Nexia» үлгүсүндөгү унаасын Ахунбаев көчөсү менен күн чыгыштан күн батышка карай башкарып бара жатып, башкы жолдо келе жаткан Каракол шаарынын тургуну И.Б.нын «Nissan X-Trail» унаасын сүзгөн. Экинчи унаа Жамансариев көчөсү менен түндүк тараптан түштүккө карай бара жаткан.
Кырсыктан жабыркагандар жок. Автоунаалар материалдык чыгымга учураган.
<>
2026-жылдын 9-мартында Жамансариев жана Ахунбаев көчөлөрүнүн кесилишинде кырсык катталган. Аталган кесилиште бат-баттан кырсыктар катталууда. Көпчүлүк айдоочулар эки жолдун кайсынысы башкы жол экенин айырмалай албай калган учурлар болууда.
Жергиликтүү тургундар аталган кесилишике жол чырак орнотуу керек экенин айтышкан.
Ал эми Ысык-Көл облустук жол кыймылынын коопсуздугун камсыздоо бөлүмү Turmush басылмасына билдиргендей, «Hyundai Sonata» үлгүсүндөгү автоунааны Каракол шаарынын 1972-жылы туулган тургуну башкарып бара жаткан. Ал Жамансариев көчөсү менен түштүктөн түндүккө карай бара жаткан учурда Каракол шаарынын 1992-жылы туулган тургунунун башкаруусундагы «Toyota Corolla» үлгүсүндөгү автоунаа Ахунбаев көчөсү менен батыштан чыгышты көздөй бара жатып, эки унаа жол кырсыгына кабылган.
Аталган жол кырсыгы Каракол ШИИБге катталып ,тергөөгө чейин териштирүү иштери башталган. Жабыркагандар жок.