Turmush — Кечээ, 10-апрелде президент Садыр Жапаров Ош шаарынын тургундары менен жолугушканда жашоочулар ар кандай маселелер менен кайрылды.
Жолугушуунун жүрүшүндө тургундар мурдагы мэрдин тушунда бузулган үйлөрдүн компенсациясы, айрым жарандарга кичине бөлмөлүү үйлөр, айрым жарандарга чоң бөлмөлүү үйлөр берилген даттанышып, үйү бузулган жарандарга үйлөр адилетсиз бөлүнүп калганын айтышты.
Президент Садыр Жапаров эл менен жолукканга чейин бийлик өкүлдөрү менен бир саат бою жыйын өткөргөнүн, анда бардык маселе көтөрүлгөнүн айтты.
«Баарбыз отурган кеңешмеде сөз болду. Муну кайталабай эле койсоңуздар. Курулуп жаткан объекттер 100гө жакын экен. Баары тең сөз жүзүндө "болду сен мобул жерге кура бер, мен сага акчаңды берем" деп коюптур. А курулушчуларга эмне, ал жерде иш болсо болду. Мисалы, 50 млн сомго бүтө турган жерди курулушчу келип туруп, "мен муну 100 миллионго салам, ошол долбоор 100 млн болот" десе, "а болду мен сага 100 млн берем" деп коюп эле кура берген экен да. Эми анын баарын токтотпойлу деп, курулуш министрин атайын ээрчитип алдым.
Мындан бир 1 ай мурун курулуш министрин [Нурдан Орунтаев] Ош менен Жалал-Абадга "ушундай курулуштарды текшерип кел" деп жөнөтсөм, бир дагы курулуштун документи жок экен. Керек болсо үйлөрдү трансформация болбогон жерге куруп ийиптир. Жүздөгөн гектар жер. Жүздөгөн гектар жер, ар кайсы жерлерге — шаардын ичи, шаардын сырты. АТР [административдик-аймактык реформа] боюнча шаардын аймагына кирген участокторго да куруп ийиптир. Анан курулушун биз Бишкекте 700 доллардан "под ключ" кылып куруп жатсак, мисалы, мектептерди, ооруканаларды жана башкаларды, кээ бир жерлерде, бул жакта — Ош менен Жалал-Абадда 1 миң 400дөн деп келишим түзүп алышыптыр. Министрди бүт баарын тең текшерип, "канча пайыз бүттү, анын баары карге келип токтоду, канча акча кетти" деп эсептеп, эскисин жылдырып, мындан ары улап кет деп туруп, министрликке өткөрүп алып жатабыз баарын.
Токтоп калган имараттардын баары бүтөт. Токтоп калган жолдорду да улантабыз. Анан дагы үйлөрү бузулуп, адилетсиз болуп кеткендерди мэр өзү бүтүрөт. А калган курулушту Курулуш министри, Транспорт министри баарын улантып, бүтүрүшөт. Башкача айтканда, башталган ишти баары бир бүтүршүбүз керек да. Документи жок кура берген боюнча Курулуш министрлигине тапшырма бердим. Анын баарын нөлдөн баштап документти жасап, анализдеп, текшерип, андан кийин калыбына келтирип туруп, улантышат», - деди президент.