Turmush — Жалал-Абад облусунун Базар-Коргон районундагы мектепке чейинки билим берүү уюмунда иштебеген жарандарга айлык төлөнүп келген. Бул тууралуу Turmush басылмасына райондук прокуратурадан билдиришти.
Маалыматка караганда, окуя №3 «Ак-Бермет» бала бакчасында болгон. Ушул тапта мамлекетке келтирилген зыян — 120 миң сомдой каражат толук кайтарылды.
«2023-2024-жылдар аралыгында коррупцияга каршы күрөшүү жана Эмгек кодексинин аткарылышы боюнча текшерүү жүргүзүлгөн. №3 «Ак-Бермет» бала бакчасынын мурдагы директору жана учурдагы директору тарабынан бала бакчада иштебеген атуулдарга табель түзүлүп, атайын бухгалтердик документтерге жалган маалыматтарды киргизип, эсеп иштерин бурмалаган мыйзамсыз иш-аракетинин негизинде мамлекеттик бюджетке 119 миң 709 сомдук материалдык зыян келтиргени такталган. Текшерүүнүн жыйынтыгы менен ченемдик укуктук актыларынын бузулушун четтетүү жөнүндө сунуш берилген. Азыркы учурда прокуратуранын сунуштамасы каралып, күнөөлүү кызматкерлер ар кандай дисциплинардык жоопкерчиликке тартылды. Аталган сумма бүгүнкү күндө толугу менен мамлекеттик бюджетке төлөндү», - деп айтылат көзөмөл органынын маалыматында.
Буга чейин райондогу №16 «Ак-Тилек» бала бакчасында да иштебеген кызматкерлерге эмгек акы төлөнүп, финансылык мыйзам бузуу фактысы катталганы аныкталган.
