Бөлүмдөр
Ишемби, 19-октябрь
Жалал-Абад облусу, Кочкор-Ата 01.03.2019 13:05 На русском

Кочкор-Атада баласын эмдетүүдөн баш тарткан эне анын себебин түшүндүрдү (сүрөт)

Turmush -  Кочкор-Ата шаарында 16 ата-эне балдарын эмдетүүдөн баш тартышкан. Маалым болгондой, шаардык оорулардын алдын алуу бөлүмүнүн кызматкерлери бул багытта түшүндүрүү иштерин жүргүзгөнү менен эч кандай майнап чыкпай келет.

Кочкор-Ата шаарынын 32 жаштагы тургуну, 3 баланын энеси Камила Калматова эмдөө алган балага салыштырмалуу эмделбеген баланын дени сак болот деп эсептейт.

«3 балам бар, улуу кызым менен ортончу уулум төрөлгөндө балдарымды эмдөөдөн өткөргөм, бирок экөөнүн тең иммунитети начарлап, ушул күнгө чейин ооруканадан башыбыз чыкпай келет. Ал эми 1 жаштагы кенже уулумду эмдеткен жокмун. Кыштын күнү балдарым тумоолоп ооруп калса дагы кенже уулум оорубайт. Мындан улам балдарды эмдетүүнүн зарылдыгы жок деп ойлойм. Учурда доктурлар уулумду эмдетүү керек экенин айтып жатышат. Бирок мен баш тарттым», - дейт К.Калматова.

Ал эми Ноокен райондук оорулардын алдын алуу жана мамлекеттик санитардык эпидемиологиялык көзөмөлдөө борборунун бөлүм башчысы Айгүл Абдразакованын айтымында, ата-энелердин баш тартуусуна интернетте тараган видеолор себеп болууда.

«Учурда биз балдарын эмдетүүдөн баш тарткан ата-энелер мындай кадамга баруусуна эмне себеп болуп жатканын сурайлы деген максатта жолугушуу уюштурсак, тилекке каршы айрым ата-энелер келген жок. Ошентсе да айрым ата-энелер вакциналардын курамында чочконун майы, алюминий жана маймыл, өлгөн жаныбарлардын микроорганизмдери бар экенин айтып. Анын баарын интернеттан тараган видеодон көрүшкөнүн, мындай вакциналар балдардын ден соолугуна жана өмүрүнө коркунуч жаратаарын айтышты. Бирок биз бул боюнча канчалык түшүндүргөнүбүз менен майнап болгон жок», - деди бөлүм башчы А.Абдразакова.

Ушул жылдын 18-январынан тарта Ош, Баткен, Жалал-Абад облустарында дин өкүлдөрү, медицина кызматкерлери, иммунолог дарыгерлер калкка эмдөөнүн зарылчылыгы тууралуу түшүндүрмө жүргүзүшкөн болчу.

Саламаттыкты сактоо министрлиги кызамык, көк жөтөл сыяктуу оорулар эмдөөнүн жардамы менен азайып баратканын, бирок соңку жылдары баш тарткандардын айынан бул жугуштуу илдеттер көп жайыла баштаганын айтууда. Өткөн жылы кызамык менен ооруган өспүрүм көз жумгандан кийин, ата-энелер өздөрү бейтапканага барып, балдарын эмдетип баштаганы да маалымдалган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×