Turmush — Ысык-Көл районунун Өрнөк айылында салттуу кол өнөрчүлүк борборунун ачылышы өттү. Бул борбор Курманжан Датка атындагы Көчмөн цивилизация борборунун базасында ачылды.
Аталган демилге Кыргыз Республикасы менен Корея Республикасынын ортосундагы кызматташтыктын алкагында, ЮНЕСКОнун колдоосу менен ишке ашырылды. Долбоордун негизги максаты — салттуу кол өнөрчүлүктү өнүктүрүү, маданий туризмди илгерилетүү жана Кыргызстандын материалдык эмес маданий мурасын сактоо үчүн туруктуу платформаны түзүү.
Жаңы борбор заманбап көп функционалдуу мейкиндик болуп саналат. Анда мастер-класстарды, окутуу программаларын, көргөзмөлөрдү жана маданий иш-чараларды өткөрүүгө бардык шарттар түзүлгөн. Ошондой эле борбор кол өнөрчүлөрдү жана алардын эмгегин жайылтуучу аянтча катары кызмат кылат.
Долбоордун алкагында музейдин инфраструктурасы толугу менен жаңыртылып, имараттар оңдоп-түзөөдөн өткөрүлдү. Климат-контроль системалары орнотулуп, жарыктандыруу жаңыланып, билим берүү жана көргөзмө зоналары заманбап жабдуулар менен камсыздалды. Мындан тышкары, сувенир дүкөнү, кофе-зона уюштурулуп, ачык асман алдында иш-чараларды өткөрүү үчүн атайын жай түзүлдү. Ошондой эле салттуу кол өнөрчүлүктүн улуттук санариптик базасын түзүү иштери жүргүзүлүүдө.
Акыркы жылдары бул демилгенин алкагында жаш усталар Кореяда стажировкадан өтүп, өлкө боюнча кеңири изилдөөлөр жүргүзүлүп, уникалдуу фото жана видео архив түзүлдү. Бул иштер мындан ары да улантылып, өзгөчө Ысык-Көл аймагына басым жасалат.
Салттуу кол өнөрчүлүк борборунун ачылышы Кыргызстандын маданий туризмин жана кол өнөрчүлүк тармагын өнүктүрүүдөгү маанилүү кадам болуп саналат. Бул демилге салт менен заманбап өнүгүүнүн айкалышын көрсөтүп, жергиликтүү жамааттар үчүн жаңы мүмкүнчүлүктөрдү ачат жана материалдык эмес маданий мурастарды сактоого өбөлгө түзөт.