Бөлүмдөр
Жума, 24-январь
Жалал-Абад облусуАла-Бука району 10.01.2020 18:58

Чек арадагы Чоң-Сайдын тургундары менен өкмөттүн өкүлү жолукту

Turmush -  Ала-Бука районуна караштуу Көк-Таш айыл аймагынын Чоң-Сай айылынын тургундары менен 9-январда өкмөттүн облустагы өкүлү Кыянбек Сатыбалдиев жолукту. Бул тууралуу аймактык кабарчы билдирди.

Маалым болгондой, анда Чоң-Сай айылынын тургундарынын атынан келген 9 жашоочу чек ара маселесин чечип берүү зарылдыгын билдирип, өз көйгөйлөрүн айтышты. Өкүл элеттиктердин ой-пикирин угуп, эгер алардын мал-жандыктары коңшу өлкөгө кирип кетсе кайтарыларын, бул үчүн коңшу өлкөнүн чек арачылары менен пикир келишпестикке баруунун зарылдыгы жоктугун айтып түшүндүрдү.

«Эки мамлекеттин ортосундагы жумушчу топ чек ара боюнча иштеп жатат, эки жылдан бери көптөгөн иштер жүрдү. Буйруса элеттиктер айткан маселе да чечилет деген үмүттөбүз. Жалал-Абад облусунда Өзбекстан менен такталбаган 6 гана участок калды. Эң негизгиси эки өлкөнүн мамилесине доо кетирип алуудан сак болушубуз керек. Чоң-Сай айылынын эли деле коңшу өлкөнүн жарандары менен карым-катнашы бардыгын айтышты. Чек арага мал-жандыктар кирип кетсе, эки тараптуу сүйлөшүүлөрдүн жыйынтыгы менен алынып келери, бул үчүн пикир келишпестикке баруунун зарылдыгы жоктугун айттык.

Мисалы, 2017-жылдан бери эле коңшу өлкөгө кирип кеткен мал-жандыктар сүйлөшүү жолу менен кайтарылып жатат. Кирип кеткен малды кайтарып алууга сөзсүз аракет көрүлөт. 6-январда Ак-Курча участогунда чек ара чырынан айыл жашоочусуна ок тийгени боюнча маалымат такталган жок. Ага карабастан жергиликтүү тургундун өз каалоосу менен гана соттук-медициналык экспертизадан өткөрүү боюнча тапшырма берилди. Координациялык кеңешме да өткөрүлүп, маселе каралды», - деди облус башчысы.

Буга чейин 6-январда Көк-Таш айыл аймагынын Ак-Курча участкасында чоң-сайлыктардын 500дөй коюн өзбек чек арачылары айдап кетип жатышканда жергиликтүүлөр менен чыр чыгып, эскертүү иретинде ок атылган болчу. Ошол эле күнү элдин мал-жандыгы кайтарылып берилген.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×