Бөлүмдөр
Дүйшөмбү, 9-декабрь
Жалал-Абад облусу, Кара-Көл 27.11.2019 11:38

Дарыгер Н.Качкынбаева сарык оорусунун түрлөрү жуга турган жайларды атады

Насират Качкынбаева
Насират Качкынбаева

Turmush -  Кара-Көл шаарындагы сулуулук салондордун жана тиш дарылоочу жайлардын санитардык абалы текшериле элек. Бул тууралуу ооруларды алдын алуу жана мамлекеттик санитардык эпидемиологиялык көзөмөлдөө борборунун адиси Гүлүмкан Жайчибекова билдирди.

Анын айтымында, 2020-жылдын 1-январына чейин жарыяланган мораторийдин негизинде акыркы эки жылдан бери шаардагы жеке менчик тиш дарылоочу жайлар жана сулуулук салондору текшериле элек.

«Мораторий жарыяланганга чейин жылына бир ирет Экономика министрлигинин уруксатынын негизинде текшерүү жүргүзүлчү. Тургундардан арыз түшкөндө прокуратура аркылуу 10 күн мурун билдирүү бергенден кийин гана текшерчүбүз. Мындай текшерүү жүрбөгөнүнө эки жылдын жүзү болду. Эки жыл мурунку маалымат боюнча шаарда 5 сулуулук салон жана 3 тиш дарылоочу жай бар эле. Андан берки санын билбейбиз», - деди ал.

Ал эми Б.Рысбеков атындагы жалпы дарыгерлер практикалоо борборунун жугуштуу ооруларды дарылоо бөлүмүнүн башчысы, дарыгер Насират Качкынбаеванын айтымында, алар жаңы талаптар боюнча иштөөдө.

«Сарык оорусу вирус аркылуу жугат. Учурда сарыктын «А», «В», «С», «Д», «Е» түрлөрү бизге белгилүү. Башка түрлөрү медицинада изилденип жатат. Бизге көбүнчө сарыктын «А» түрү менен жабыркагандар түшөт. Биз бейтаптарды текшерип, өтө оор абалдагыларын ооруканага жаткырабыз. Жеңил түрү менен жабыркагандарды амбулатордук шартта дарылайбыз. Жаңы талаптарга ылайык ушундай иш жүргүзүлүүдө», - дейт ал.

Анын айтымында, сарык оорусунун «А» жана «Е» түрү кир кол, суу, тамак-аш аркылуу жугат. Ал эми «В», «С», «Д» түрлөрү инъекция жана кан аркылуу жугат.

«Мисалы, «В», «С», «Д» түрлөрү тиш дарылоочу жайлардан, сулуулук салондордон, тиш жуугучтар аркылуу жугушу мүмкүн. Акыркы үч жылдын отчетун караганда, сарыктын курч «В», «С» түрү менен бейтаптар кайрылган жок. Себеби балдар төрөлгөндө эле эмдөө жүргүзүлүп жатканында. Эмдөөнүн дагы оң таасири тийип жатат деп ойлойм. Сарыктын «С» түрүнө карата вакцина жок. Эми бизге өнөкөт «С», «В» түрү менен ооругандар түшүп калышы мүмкүн. Ал башка оору боюнча текшерүүдөн өтүп жатып билинген жагдайлар бар. Сарыктын «Д» менен «В» түрү кошулуп, «В» менен «С» кошулган түрлөрү да кездешет. Сарыктын «С» түрү боюнча үч бейтап кайрылды, ал эми «Д» түрү боюнча өткөн жылы бир бейтап катталган. Сарыктын «А» түрү суук мезгилде көбөйөт. Оор жана орточо түрү менен жабыркагандар үй шартында дарыланышат», - деди дарыгер.

Ошондой эле ал ооруну алдын алуу жолдоруна токтолду.

«Сарык оорусун алдын алуу үчүн сууну кайнатып ичүү керек. Колду таза жууп, тамак-аш азыктарын таза пайдалануу керек. Ал эми чачтарачтарда жана тиш дарылоочу жайларда ар бир кишини тейлөөлөдө бир жолу колдонулуучу жабдыктар колдонулушу зарыл. Сакал алгычтар, маникюр, педикюр жасоочу жабдыктар ар бир адамдын өзүндө болушу шарт. Азыр биз бир ирет колдонулуучу шприц жана кол кап пайдаланабыз. Тиш дарылоочу жайларда санитардык нормалар сакталышы керек», - деди Н.Качкынбаева.

Ал эми ооруларды алдын алуу жана мамлекеттик санэпидкөзөмөл борборунун адиси Айсулуу Сатарованын айтымында, шаарда акыркы 9 айда сарыктын «А» түрү боюнча 19 учур катталган. Сарыктын белгисиз түрү жана анын өнөкөт түрү менен бирден киши катталган. Өткөн жылдын 9 айына салыштырмалуу быйыл 9 учурга аз болгон. Алардын басымдуу бөлүгүн 5-14 жашка чейинки балдар түздү.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×