Бөлүмдөр
Бейшемби, 5-декабрь
Жалал-Абад облусуАксы району 24.11.2019 15:10 На русском

Аксыдагы массалык мушташ: Тургундар жумуштан бошотулган мугалимдерди коргоп чыгышты. Видео

Turmush -  Аксы районуна караштуу Жаңы-Жол айыл өкмөтүндөгү массалык мушташка катышкан Жоробек Мамытбеков атындагы орто мектептин окуучу кыздарынын ата-энелери жоопкерчиликке тартылышы керек. Ал эми жумуштан бошотулган төрт мугалимге мүмкүнчүлүк берүү заыл. Бул тууралуу Жаңы-Жол айыл өкмөтүнүн активисттери өкмөттүн Жалал-Абад облусундагы өкүлү катышкан жыйында айтып чыгышты.

Алар окуучу кыздардын массалык мушташынан кийин 4 мугалимдин жумуштан алынышына нааразы экендиктерин билдиришти. Жаңы-Жол айыл акмөтүнүн тургуну Куштарбек Мамытбеков мугалимдерди коргоо комитетин түзүү сунушун киргизди.

«Мугалимдин эмнесин күнөөлөйсүңөр. Алар сабак берип жатат, билимге жооп беришсин. Тарбияны ата-энелер бериши керек. Балдарга 10-11 миң сомдук телефондорду алып берип жатабыз. Мугалимдерге караганда азыр балдар жакшы кийинишет. Төрт мугалимдин жумуштан алынышын туура эмес деп ойлойм. Мейли, мыйзамдын негизинде убактылуу жумуштан четтетип турушсун, бирок жумуштан биротоло алып салбаш керек да. Ал шоруң каткырлар эмне болот? Жумуштан алынгандардын бири Жээнайым 40 жылдан бери бут кийимин жыртып, ушул мектепте балдарга билим берип келет. Шаарга кетип калууга мүмкүнчүлүгү бар, бирок ага карабай ушул жерде иштечү. Мугалимдерде эмне айып? Сайдын жээгинде мушташкан окуучулардын ата-энелерин кошо камагыла. Мушташка барган кыздардын баарын каттоого алып, ата-энелерине айып пул салынсын. Булар барчылыктан, токчулуктан урушуп жатышат. Менин да неберем мушташкандарды карап туруптур. Келиниме кызыңа айт, бир туугандары менен коштошуп алсын, ал дагы милицияга барып жооп берет дедим. Неберемди тилдедим. Мен да мугалимдин баласымын. Иштен алынган мугалимдерди коргоо комитетин түзөм, алым барынча күрөшөм. Балдардын тарбиясыздыгы, адепсиздиги үчүн ата-энелер өзүбүз жооп беришибиз керек», - деди аксакал Куштарбек Мамытбеков.

Жыйынга катышкандардын айрымдары аксакалды колдошту.

Ж.Мамытбеков атындагы орто мектептин окуучулары 2018-жылы физика сабагы боюнча Орто Азия өлкөлөрү арасында өткөн олимпиадада 3-орунду алышканы белгилүү болду.

Жаңы-Жол айыл өкмөтүнүн башчысы Жылдызкан Осмонова катачылыктарга жол бербөө үчүн уставдарга өзгөртүү киргизерин, ата-энелер менен иштешүү солгун болгонун айтты.

«Бир жылда бир жолу конференция өтүп, сүйлөшүп турчубуз. Эми бул катачылыктын үстүнөн иштейбиз. Мушташкан кыздарыбыз жакшы жетишкендикке жетишип жүргөн. Башка мектептерден олимпиадаларга 1-2 окуучу катышса, биздин мектептен 5-6 окуучу облустук олимпиадаларга катышып жүрүшкөн. Мындан ары мындай кемчиликтер болбойт», - деди Ж.Осмонова.

Ж.Мамытбеков атындагы орто мектептин директорунун милдетин убактылуу аткарып жаткан Каныбек Молдомырзаевдин айтымында, мушташка катышкан кыздар буга чейин тартип бузушкан эмес. Жакшы окуган окуучулар болчу.

«Мушташка катышкан кыздардын бири республикалык олимпиадаларга чейин барып, жакшы орундарга жетишип жүргөн. Тынымсыз түшүндүрүү иштери жүргүзүлүп келген, мындан ары да жүргүзүлөт», - деди Каныбек Молдомырзаев.

Маалым болгондой, 11-класстын окуучуларына кичүү класстагы кыздар «сиз» деп кайрылышпай койгондуктан чыр чыккан.

Ж.Мамытбеков мектеби былтыр облуста «Жылдын мыкты мектеби» болуп табылган. Мектепте 850 окуучу билим алып, 50дөн ашуун мугалим эмгектенет.

Буга чейин Turmush басылмасы Аксы районунун Жаңы-Жол айылындагы №10 Жоробек Мамытбеков атындагы мектептин 10-11-классынын окуучу кыздарынын мушташынан кийин чогулуш өткөрүлгөнүн жазган. Анда мектептин директору, директордун окуу-тарбия иштери боюнча орун басары, класстан жана мектептен тышкаркы иштердин уюштуруучусу, социалдык педагог кетирген кемчиликтеринин негизинде ээлеген кызматтарынан бошотулган.

Кийнчерээк райондук билим берүү бөлүмүнүн башчысы Угулай Зиябекова да ээлеген кызматынан бошотулган.

Окуя 18-ноябрь күнү саат 17:30 чамасында болгон. Аксы районунун Жаңы-Жол айылындагы №10 Жоробек Мамытбеков атындагы мектептин 10-11-классынын окуучу кыздарынын арасында пикир келишпестик жаралып, мушташып кетишкен. Аталган факт Аксы РИИБ тарабынан Кылмыштардын жана жоруктардын бирдиктүү реестрине катталып, Жазык кодексинин 266-беренеси («Ээнбаштык») менен сотко чейинки өндүрүш иштери башталган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×