Бөлүмдөр
Бейшемби, 5-декабрь
Жалал-Абад облусу, Жалал-Абад 22.11.2019 17:06

Жалал-Абадда Д.Садырбаевдин 80 жылдыгын утурлай илимий конференция өттү

Turmush -  Жалал-Абад мамлекеттик университетинде 20-ноябрда Кыргыз эл баатыры, Кыргыз Республикасынын эл артисти, коомдук ишмер, публицист, режиссёр жана саясатчы Дооронбек Садырбаевдин 80 жылдык мааракесин утурлай илимий конференция болуп өттү. Бул тууралуу аймактык кабарчы билдирди.

Иш-чарага өкмөттүн Жалал-Абад облусундагы өкүлүнүн орун басары Ырысбек Ызабеков, мэр жана акимдер, студенттер, мугалимдер катышты. Катышуучулар коомдук ишмердин басып өткөн жолун, эмгектерин эскеришип, чакан даректүү тасма көрсөтүлдү.

«Дооронбек агабыздын 80 жылдык мааракесин утурлай облустун аймактарында иш-чаралар өттү. Бүгүнкү илимий практикалык конференция жыйынтыктоочу иш-чара болуп эсептелет. Декабрь айында Бишкек шаарында чоң иш-чара болоору күтүлүүдө. Мындай улуу инсандарды жаш муундар сөзсүз билиши керек», - деди Ы.Ызабеков.

Дооронбек Садырбаев Жалал-Абад облусунун Ноокен районундагы Апыртан айылында (мурдагы «Бирлик» колхозунда) 1939-жылдын 13-февралында туулган. Атасы «Бирлик» колхозунун төрагасы болуп иштеген. Ал 14 жашка чыкканда атасы 45 жашында оорудан улам каза болгон. Д.Садырбаев ошол айылда 7-класска чейин окуган. 7-классты бүткөндөн кийин райондун борборундагы №1 орто мектебине кирип, 1957-жылы орто мектепти аяктаган. Кийин Ленинграддагы Театр, музыка жана кинематография институтун бүтүргөн.

Д.Садырбаев 70тен ашуун даректүү тасмалардын, «Арман», «Махабат дастаны», «Эне бөрүнүн ыйы» өңдүү 16 көркөм тасманын автору. Анын 8 көркөм жыйнагы, 700дөн ашык публицистикалык макалалары жарык көргөн. Анын көзү тирүү болгондо 13-февралда 80 жашка толмок.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×