Бөлүмдөр
Жума, 14-декабрь
Жалал-Абад облусуТоктогул району 14.03.2018 10:32

Кар көчкү түшкөн Ош—Бишкек жолундагы Чычкан постунда 200дөй жүк ташуучу унаа токтоп турат (фото)

Turmush -  Ош—Бишкек унаа жолунун 246-чакырымында 2,5 млн метр куб кар көчкү түшкөндүгүнө байланыштуу Токтогул районундагы «Чычкан» атайын стационардык постунда 200дөй оор жүк ташуучу унаалар токтоп турат. Бул тууралуу Жалал-Абад облустук жол кыймылынын коопсуздугун көзөмөлдөө бөлүмүнүн ага инспектору Айбек Сатыбалдиев билдирди.

Анын айтымында, жеңил унаалар Кара-Көл, Таш-Көмүр шаарларынан кайтарылууда.

«Бишкек—Ош унаа жолу менен алыскы сапарга чыкпоону эскертебиз. Анткени 246-чакырымындагы Көчкүлүү-Булак участкасында 2,5 миллион кубка жеткен кар көчкү түшүп, жол жабылган. Жол эки сутка жабылаары айтылууда», - деди ал.

Буга чейин ӨКМдин басма сөз кызматы Бишкек—Ош унаа жолунун 246-чакырымында кечээ, 13-мартта саат 22:40 чамасында көлөмү 2,5 миллион куб кар көчкү түшкөндүгүн маалымдаган.

Маалыматка караганда, саат 06:00гө карата, «Сосновка» (Жайыл району) постунда 5 жеңил унаа жана 50 оор жүк ташуучу унаалары кезекте турат, унаалардын айдоочуларына жана жүргүнчүлөрүнө ысык тамак жана чай берүүчү пункту уюштурулуп, тез жардам кызматынан бир автоунаа нөөмөттө турат. Жалал-Абад облусунун Токтогул районунун «Арал» постунда 35 жеңил унаа жана 60 оор жүк ташуучу унаалары турат, жеринде 2 даана чатыр тигилип, темир титандар орнотулуп, жүргүнчүлөргө ысык чай уюштурулду. Ал эми Суусамыр—Талас—Тараз унаа жолунда токтоп турган унаалар жок.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×